ಜೂನ್ನಲ್ಲಿ ಭಾರತದ ಸರಕು ವ್ಯಾಪಾರ ಕೊರತೆ(Trade Deficit)ಯಲ್ಲಿ ಭಾರೀ ಏರಿಕೆ
2026ರ ಜೂನ್ ತಿಂಗಳಲ್ಲಿ ಭಾರತದ ಸರಕು (Merchandise) ವ್ಯಾಪಾರ ಕೊರತೆ (Trade Deficit) ವರ್ಷದಿಂದ ವರ್ಷಕ್ಕೆ (YoY) ಶೇ.59ರಷ್ಟು ಏರಿಕೆಯಾಗಿ 30.43 ಬಿಲಿಯನ್ ಅಮೆರಿಕನ್ ಡಾಲರ್ಗೆ ತಲುಪಿದೆ. ಕಳೆದ ವರ್ಷದ ಜೂನ್ನಲ್ಲಿ ಈ ಕೊರತೆ 19.10 ಬಿಲಿಯನ್ ಡಾಲರ್ ಆಗಿದ್ದರೆ, ಮೇ 2026ರಲ್ಲಿ 28.21 ಬಿಲಿಯನ್ ಡಾಲರ್ ದಾಖಲಾಗಿತ್ತು.
ಸರ್ಕಾರ ಬಿಡುಗಡೆ ಮಾಡಿದ ವಾಣಿಜ್ಯ ಅಂಕಿ-ಅಂಶಗಳ ಪ್ರಕಾರ, ಜೂನ್ನಲ್ಲಿ ಭಾರತದ ಸರಕು ರಫ್ತು 40.41 ಬಿಲಿಯನ್ ಡಾಲರ್ ಹಾಗೂ ಸರಕು ಆಮದು 70.84 ಬಿಲಿಯನ್ ಡಾಲರ್ ಆಗಿದೆ. ಮೇ ತಿಂಗಳಿಗೆ ಹೋಲಿಸಿದರೆ ರಫ್ತು ಮತ್ತು ಆಮದು ಎರಡೂ ಕಡಿಮೆಯಾಗಿದ್ದರೂ, ಆಮದು ಪ್ರಮಾಣವು ರಫ್ತಿಗಿಂತ ಹೆಚ್ಚಿರುವುದರಿಂದ ವ್ಯಾಪಾರ ಕೊರತೆ ಮತ್ತಷ್ಟು ವಿಸ್ತರಿಸಿದೆ.
ಕಾರಣ ಏನು..?
ದೇಶದಲ್ಲಿ ಕಚ್ಚಾ ತೈಲ, ಯಂತ್ರೋಪಕರಣಗಳು, ಎಲೆಕ್ಟ್ರಾನಿಕ್ಸ್, ಕೈಗಾರಿಕಾ ಕಚ್ಚಾ ವಸ್ತುಗಳು ಹಾಗೂ ಅಮೂಲ್ಯ ಲೋಹಗಳ ಆಮದು ಹೆಚ್ಚಿರುವುದು ವ್ಯಾಪಾರ ಕೊರತೆ ಏರಿಕೆಗೆ ಪ್ರಮುಖ ಕಾರಣವಾಗಿದೆ. ಇದರ ಜೊತೆಗೆ ಜೂನ್ನಲ್ಲಿ ರಫ್ತು ಪ್ರಮಾಣದಲ್ಲಿ ಕಂಡುಬಂದ ಇಳಿಕೆ ಮತ್ತು ಜಾಗತಿಕ ಆರ್ಥಿಕ ಅನಿಶ್ಚಿತತೆ, ಹಣದುಬ್ಬರ ಹಾಗೂ ಪ್ರಮುಖ ರಾಷ್ಟ್ರಗಳ ನಿಧಾನಗತಿಯ ಆರ್ಥಿಕ ಬೆಳವಣಿಗೆಯೂ ಭಾರತದ ರಫ್ತಿನ ಮೇಲೆ ಪರಿಣಾಮ ಬೀರಿದೆ.
ಇದನ್ನೂ ಓದಿ : ಜೂನ್ನಲ್ಲಿ ಚಿಲ್ಲರೆ ಹಣದುಬ್ಬರ (Retail Inflation) 4.38%ಕ್ಕೆ ಏರಿಕೆ
ವ್ಯಾಪಾರ ಕೊರತೆ ಎಂದರೆ ಒಂದು ದೇಶದ ಆಮದು ಮೌಲ್ಯವು ರಫ್ತು ಮೌಲ್ಯಕ್ಕಿಂತ ಹೆಚ್ಚಿರುವ ಪರಿಸ್ಥಿತಿ. ಜೂನ್ನಲ್ಲಿ ಭಾರತವು 70.84 ಬಿಲಿಯನ್ ಡಾಲರ್ ಮೌಲ್ಯದ ಸರಕುಗಳನ್ನು ಆಮದು ಮಾಡಿಕೊಂಡಿದ್ದು, 40.41 ಬಿಲಿಯನ್ ಡಾಲರ್ ಮೌಲ್ಯದ ಸರಕುಗಳನ್ನು ರಫ್ತು ಮಾಡಿದೆ. ಇದರಿಂದ 30.43 ಬಿಲಿಯನ್ ಡಾಲರ್ ವ್ಯಾಪಾರ ಕೊರತೆ ಉಂಟಾಗಿದೆ.
ಪರಿಣಾಮ ಏನು..?
ಆರ್ಥಿಕ ತಜ್ಞರ ಪ್ರಕಾರ, ವ್ಯಾಪಾರ ಕೊರತೆ ನಿರಂತರವಾಗಿ ಹೆಚ್ಚಾದರೆ ದೇಶದ ಚಾಲ್ತಿ ಖಾತೆ ಕೊರತೆ (Current Account Deficit) ಮೇಲೆ ಒತ್ತಡ ಹೆಚ್ಚುವ ಸಾಧ್ಯತೆ ಇದೆ. ಜೊತೆಗೆ ರೂಪಾಯಿ ಮೌಲ್ಯ ಕುಸಿತ, ಆಮದು ವೆಚ್ಚ ಏರಿಕೆ ಹಾಗೂ ಹಣದುಬ್ಬರದ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ರಫ್ತು ವೃದ್ಧಿ, ಉತ್ಪಾದನಾ ಸ್ಪರ್ಧಾತ್ಮಕತೆ ಹೆಚ್ಚಿಸುವುದು ಮತ್ತು ಹೊಸ ದೇಶಗಳೊಂದಿಗೆ ಅನುಕೂಲಕರ ವ್ಯಾಪಾರ ಒಪ್ಪಂದಗಳನ್ನು ಮಾಡಿಕೊಳ್ಳುವುದು ಅಗತ್ಯವಾಗಿದೆ.
