ಜೂನ್ನಲ್ಲಿ ಚಿಲ್ಲರೆ ಹಣದುಬ್ಬರ (Retail Inflation) 4.38%ಕ್ಕೆ ಏರಿಕೆ
ದೇಶದಲ್ಲಿ ಚಿಲ್ಲರೆ ಹಣದುಬ್ಬರ (Retail Inflation) ಜೂನ್ ತಿಂಗಳಲ್ಲಿ 4.38%ಕ್ಕೆ ಏರಿಕೆಯಾಗಿದೆ. ಮೇ ತಿಂಗಳಲ್ಲಿ ಇದು 3.93% ದಾಖಲಾಗಿತ್ತು. ಹೊಸ 2024 ಆಧಾರ ವರ್ಷದ (Base Year) ಗ್ರಾಹಕ ಬೆಲೆ ಸೂಚ್ಯಂಕ (CPI) ಸರಣಿಯಲ್ಲಿ ಹಣದುಬ್ಬರವು ಮೊದಲ ಬಾರಿಗೆ 4% ಗಡಿ ದಾಟಿದೆ ಎಂದು ರಾಷ್ಟ್ರೀಯ ಅಂಕಿಅಂಶ ಕಚೇರಿ (NSO) ಬಿಡುಗಡೆ ಮಾಡಿದ ಅಂಕಿಅಂಶಗಳು ತಿಳಿಸಿವೆ.
ಆಹಾರ ವಸ್ತುಗಳ ಹಣದುಬ್ಬರವು ಮೇ ತಿಂಗಳ 4.78%ರಿಂದ ಜೂನ್ನಲ್ಲಿ 5.32%ಕ್ಕೆ ಏರಿಕೆಯಾಗಿದೆ. ಇದರಿಂದ ಒಟ್ಟಾರೆ ಚಿಲ್ಲರೆ ಹಣದುಬ್ಬರದ ಮೇಲೂ ಪರಿಣಾಮ ಬಿದ್ದಿದೆ.
ಜೂನ್ ತಿಂಗಳಲ್ಲಿ ಬೆಳ್ಳಿ ಆಭರಣಗಳು, ಶುಂಠಿ, ಚಿನ್ನ/ವಜ್ರ/ಪ್ಲಾಟಿನಂ ಆಭರಣಗಳು, ಟೊಮ್ಯಾಟೊ, ಒಣದ್ರಾಕ್ಷಿ (ಕಿಷ್ಮಿಷ್) ಸೇರಿದಂತೆ ಕೆಲವು ವಸ್ತುಗಳ ಬೆಲೆಗಳಲ್ಲಿ ಅತಿಹೆಚ್ಚು ಏರಿಕೆ ದಾಖಲಾಗಿದೆ. ಮತ್ತೊಂದೆಡೆ ಆಲೂಗಡ್ಡೆ, ಬಟಾಣಿ, ಕಾರು ಮತ್ತು ಜೀಪ್, ಜೀರಿಗೆ, ಮೋಟಾರ್ಸೈಕಲ್ ಹಾಗೂ ಸ್ಕೂಟರ್ ಬೆಲೆಗಳಲ್ಲಿ ಕಡಿಮೆ ಹಣದುಬ್ಬರ ಕಂಡುಬಂದಿದೆ.
ಗ್ರಾಮೀಣ ಪ್ರದೇಶಗಳಲ್ಲಿ ಹಣದುಬ್ಬರ 4.74% ಇದ್ದರೆ, ನಗರ ಪ್ರದೇಶಗಳಲ್ಲಿ ಅದು 3.92% ದಾಖಲಾಗಿದೆ. ರಾಜ್ಯವಾರು ಅಂಕಿಅಂಶಗಳಲ್ಲಿ ತೆಲಂಗಾಣದಲ್ಲಿ ಅತಿ ಹೆಚ್ಚು 6.36% ಹಣದುಬ್ಬರ ದಾಖಲಾಗಿದ್ದು, ಮಿಜೋರಾಂನಲ್ಲಿ ಅತಿ ಕಡಿಮೆ 1.63% ದಾಖಲಾಗಿದೆ.
ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಹಣದುಬ್ಬರವನ್ನು 4% ಮಟ್ಟದಲ್ಲಿ ಕಾಯ್ದುಕೊಳ್ಳುವ ಗುರಿ ಹೊಂದಿದ್ದು, 2% ಮೇಲಾಟ-ಕೆಳಾಟದ ಸಹಿಷ್ಣುತೆ ಮಿತಿ ನೀಡಲಾಗಿದೆ. ಗ್ರಾಹಕ ಬೆಲೆ ಸೂಚ್ಯಂಕ (CPI) ಆಧಾರಿತ ಹಣದುಬ್ಬರವೇ ಆರ್ಬಿಐನ ದ್ವೈಮಾಸಿಕ ಹಣಕಾಸು ನೀತಿ ನಿರ್ಧಾರಗಳಿಗೆ ಪ್ರಮುಖ ಮಾನದಂಡವಾಗಿದೆ. ಆರ್ಬಿಐ ಹಣಕಾಸು ನೀತಿ ಸಮಿತಿಯ (MPC) ಮುಂದಿನ ಸಭೆ ಆಗಸ್ಟ್ 3ರಿಂದ 5ರವರೆಗೆ ನಡೆಯಲಿದೆ.
ಗ್ರಾಹಕ ಬೆಲೆ ಸೂಚ್ಯಂಕ (CPI-Consumer Price Index) ಎಂದರೇನು..?
ಗ್ರಾಹಕರು ಖರೀದಿಸುವ ವಸ್ತುಗಳು ಮತ್ತು ಸೇವೆಗಳ ಬೆಲೆಗಳಲ್ಲಿ ಕಾಲಾನಂತರ ಉಂಟಾಗುವ ಬದಲಾವಣೆಗಳನ್ನು ಅಳೆಯುವ ಸೂಚ್ಯಂಕವೇ ಗ್ರಾಹಕ ಬೆಲೆ ಸೂಚ್ಯಂಕ (Consumer Price Index – CPI). ಇದು ದೇಶದ ಚಿಲ್ಲರೆ ಹಣದುಬ್ಬರವನ್ನು ಅಳೆಯುವ ಪ್ರಮುಖ ಆರ್ಥಿಕ ಸೂಚಕವಾಗಿದೆ.
2024ರ ಹೊಸ CPI ಸರಣಿಯ ಪ್ರಮುಖ ಬದಲಾವಣೆಗಳು :
*ಹೊಸ ಸರಣಿಯ ಆಧಾರ ವರ್ಷ 2024 = 100.
*2023-24ರ ಗೃಹ ಬಳಕೆ ವೆಚ್ಚ ಸಮೀಕ್ಷೆ (HCES) ಆಧಾರವಾಗಿ ವಸ್ತುಗಳ ಪಟ್ಟಿ ಹಾಗೂ ತೂಕಗಳನ್ನು ಪರಿಷ್ಕರಿಸಲಾಗಿದೆ.
*ಒಟ್ಟು ತೂಕ ಹೊಂದಿರುವ ವಸ್ತುಗಳ ಸಂಖ್ಯೆ 299ರಿಂದ 358ಕ್ಕೆ ಹೆಚ್ಚಿಸಲಾಗಿದೆ.
*ಗ್ರಾಮೀಣ 1,465 ಮಾರುಕಟ್ಟೆಗಳು, ನಗರ 1,395 ಮಾರುಕಟ್ಟೆಗಳು ಹಾಗೂ 434 ಪಟ್ಟಣಗಳು ವ್ಯಾಪ್ತಿಗೆ ಸೇರಿವೆ.
*12 ಆನ್ಲೈನ್ ಮಾರುಕಟ್ಟೆಗಳನ್ನು ಮೊದಲ ಬಾರಿಗೆ ಸೇರಿಸಿ ಇ-ಕಾಮರ್ಸ್ ವೇದಿಕೆಗಳ ಬೆಲೆಗಳನ್ನೂ ಪರಿಗಣಿಸಲಾಗಿದೆ.
*ಗ್ರಾಮೀಣ ವಸತಿ, ಆನ್ಲೈನ್ ಸ್ಟ್ರೀಮಿಂಗ್ ಸೇವೆಗಳು, ಮೌಲ್ಯವರ್ಧಿತ ಹಾಲು ಉತ್ಪನ್ನಗಳು, ಪೆನ್ ಡ್ರೈವ್, ಎಕ್ಸ್ಟರ್ನಲ್ ಹಾರ್ಡ್ ಡಿಸ್ಕ್, ಬೇಬಿ ಸಿಟ್ಟರ್ ಸೇವೆ, ವ್ಯಾಯಾಮ ಉಪಕರಣಗಳು ಸೇರಿದಂತೆ ಹೊಸ ವಸ್ತುಗಳನ್ನು ಸೇರಿಸಲಾಗಿದೆ.
*VCR/VCD/DVD ಪ್ಲೇಯರ್, ರೇಡಿಯೋ, ಟೇಪ್ ರೆಕಾರ್ಡರ್, ಸೆಕೆಂಡ್ ಹ್ಯಾಂಡ್ ಬಟ್ಟೆ, CD/DVD ಕ್ಯಾಸೆಟ್ಗಳು, ಕೊಯರ್ ಹಗ್ಗ ಮೊದಲಾದ ಹಳೆಯ ವಸ್ತುಗಳನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿದೆ.
