ಕಾಂಗೋ-ಉಗಾಂಡಾದಲ್ಲಿ ಎಬೋಲಾ ಆತಂಕ : ಜಾಗತಿಕ ಆರೋಗ್ಯ ತುರ್ತು ಪರಿಸ್ಥಿತಿ ಘೋಷಣೆ
ವಿಶ್ವ ಆರೋಗ್ಯ ಸಂಸ್ಥೆ (WHO) ಕಾಂಗೋ ಪ್ರಜಾಸತ್ತಾತ್ಮಕ ಗಣರಾಜ್ಯ (DRC) ಮತ್ತು ಉಗಾಂಡಾದಲ್ಲಿ ಹರಡುತ್ತಿರುವ ಎಬೋಲಾ ವೈರಸ್ ಸೋಂಕನ್ನು “ಅಂತರರಾಷ್ಟ್ರೀಯ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ” (Public Health Emergency of International Concern – PHEIC) ಎಂದು ಘೋಷಿಸಿದೆ. ಸೋಂಕಿನ ಪ್ರಕರಣಗಳು ವೇಗವಾಗಿ ಹೆಚ್ಚುತ್ತಿರುವುದು, ಗಡಿ ದಾಟಿ ಹರಡುತ್ತಿರುವುದು ಮತ್ತು ರೋಗದ ವ್ಯಾಪ್ತಿಯ ಬಗ್ಗೆ ಇನ್ನೂ ಸ್ಪಷ್ಟ ಮಾಹಿತಿ ಲಭ್ಯವಾಗದಿರುವುದು ಈ ನಿರ್ಧಾರಕ್ಕೆ ಕಾರಣವಾಗಿದೆ.
WHO ಮಹಾನಿರ್ದೇಶಕ ಡಾ. ಟೆಡ್ರೋಸ್ ಅಧಾನೊಮ್ ಘೆಬ್ರೆಯೇಸಸ್ ಈ ಘೋಷಣೆಯನ್ನು ಮಾಡಿದ್ದು, ವೈರಸ್ನ “ಬುಂಡಿಬುಗ್ಯೋ” (Bundibugyo) ತಳಿಯೊಂದಿಗೆ ಸಂಬಂಧಿಸಿದ ದೃಢೀಕೃತ ಮತ್ತು ಶಂಕಿತ ಪ್ರಕರಣಗಳು ಪತ್ತೆಯಾಗಿರುವುದಾಗಿ ತಿಳಿಸಿದ್ದಾರೆ.
ಎಬೋಲಾ ಸೋಂಕಿನ ಇತ್ತೀಚಿನ ಬೆಳವಣಿಗೆಗಳು ಜಾಗತಿಕ ಆರೋಗ್ಯ ವ್ಯವಸ್ಥೆಗೆ ಮತ್ತೊಮ್ಮೆ ಎಚ್ಚರಿಕೆಯ ಗಂಟೆ ಮೂಡಿಸಿರುವುದಾಗಿ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಕಾಂಗೋದಲ್ಲಿ ಆತಂಕಕಾರಿ ಸ್ಥಿತಿ :
ಕಾಂಗೋದ ಪೂರ್ವ ಭಾಗದ ಇಟುರಿ ಪ್ರಾಂತ್ಯದಲ್ಲಿ ಈಗಾಗಲೇ 8 ಪ್ರಯೋಗಾಲಯದಲ್ಲಿ 246 ಶಂಕಿತ ಪ್ರಕರಣಗಳು ದೃಢಪಟ್ಟಿದ್ದು 80 ಶಂಕಿತ ಸಾವುಗಳು ಸಂಭವಿಸಿವೆ. ಇದರ ಜೊತೆಗೆ ರಾಜಧಾನಿ ಕಿನ್ಷಾಸಾ ನಗರದಲ್ಲಿಯೂ ಸೋಂಕು ದೃಢಪಟ್ಟಿದೆ. ಉಗಾಂಡಾದಲ್ಲೂ ಕಾಂಗೋದಿಂದ ಪ್ರಯಾಣಿಸಿದ ಇಬ್ಬರಲ್ಲಿ ಸೋಂಕು ಪತ್ತೆಯಾಗಿದ್ದು, ಅವರನ್ನು ತೀವ್ರ ನಿಗಾ ಘಟಕದಲ್ಲಿ ದಾಖಲಿಸಲಾಗಿದೆ.
ಆರೋಗ್ಯ ಸಿಬ್ಬಂದಿಯ ಸಾವು ಆತಂಕ ಹೆಚ್ಚಿಸಿದೆ :
ಎಬೋಲಾ ಸೋಂಕಿನಿಂದ ಕನಿಷ್ಠ ನಾಲ್ವರು ಆರೋಗ್ಯ ಸಿಬ್ಬಂದಿ ಮೃತಪಟ್ಟಿರುವುದು WHOಗೆ ಮತ್ತಷ್ಟು ಚಿಂತೆ ಉಂಟುಮಾಡಿದೆ. ಆಸ್ಪತ್ರೆಗಳಲ್ಲಿ ಸೋಂಕು ನಿಯಂತ್ರಣ ಕ್ರಮಗಳು ಸಮರ್ಪಕವಾಗಿಲ್ಲ ಎಂಬ ಅನುಮಾನ ವ್ಯಕ್ತವಾಗಿದೆ.
WHO ಪ್ರಕಾರ, ಈಗ ಕಂಡುಬರುತ್ತಿರುವ ಪ್ರಕರಣಗಳಿಗಿಂತ ಸೋಂಕಿನ ಪ್ರಮಾಣ ಇನ್ನಷ್ಟು ದೊಡ್ಡದಾಗಿರುವ ಸಾಧ್ಯತೆ ಇದೆ. ಅನೇಕ ಅನಿರೀಕ್ಷಿತ ಸಾವುಗಳು, ಪರೀಕ್ಷೆಗಳಲ್ಲಿ ಹೆಚ್ಚಿನ ಪಾಸಿಟಿವಿಟಿ ಪ್ರಮಾಣ ಮತ್ತು ಸೋಂಕು ಹರಡುವ ಮಾರ್ಗಗಳ ಬಗ್ಗೆ ಅಪೂರ್ಣ ಮಾಹಿತಿ ಇರುವುದರಿಂದ ಪರಿಸ್ಥಿತಿ ಗಂಭೀರವಾಗಿದೆ.
ಇನ್ನೂ “ಪ್ಯಾಂಡಮಿಕ್” ಇಲ್ಲ :
WHO ಸ್ಪಷ್ಟಪಡಿಸಿರುವಂತೆ, ಪರಿಸ್ಥಿತಿ ಗಂಭೀರವಾದರೂ ಇದನ್ನು ಇನ್ನೂ “ಜಾಗತಿಕ ಮಹಾಮಾರಿ ತುರ್ತು ಪರಿಸ್ಥಿತಿ” (Pandemic Emergency) ಎಂದು ಘೋಷಿಸಲು ಅಗತ್ಯ ಮಾನದಂಡಗಳು ಪೂರೈಸಿಲ್ಲ. ಆದರೆ ಗಡಿ ಪ್ರದೇಶಗಳಲ್ಲಿ ಜನರ ಸಂಚಾರ, ವ್ಯಾಪಾರ ಸಂಪರ್ಕಗಳು ಮತ್ತು ಮಾನವೀಯ ಸಂಕಷ್ಟಗಳು ಇರುವುದರಿಂದ ಪಕ್ಕದ ರಾಷ್ಟ್ರಗಳಿಗೆ ಸೋಂಕು ಹರಡುವ ಅಪಾಯ ಹೆಚ್ಚಿದೆ ಎಂದು ಎಚ್ಚರಿಕೆ ನೀಡಲಾಗಿದೆ.
ಈ ಸಂದರ್ಭದಲ್ಲಿಯೂ WHO ಅಂತರರಾಷ್ಟ್ರೀಯ ಪ್ರಯಾಣ ಅಥವಾ ವ್ಯಾಪಾರಕ್ಕೆ ಯಾವುದೇ ನಿರ್ಬಂಧಗಳನ್ನು ಶಿಫಾರಸು ಮಾಡಿಲ್ಲ. ಬದಲಾಗಿ ದೇಶಗಳು:
PHEIC ಎಂದರೇನು?
PHEIC (Public Health Emergency of International Concern) ಎಂದರೆ, ಒಂದು ದೇಶದ ಗಡಿಗಳನ್ನು ಮೀರಿ ಇತರ ರಾಷ್ಟ್ರಗಳಿಗೆ ಆರೋಗ್ಯ ಅಪಾಯ ಉಂಟುಮಾಡುವ ಮತ್ತು ಜಾಗತಿಕ ಮಟ್ಟದಲ್ಲಿ ಸಮನ್ವಯಿತ ಕ್ರಮ ಅಗತ್ಯವಾಗುವಂತಹ ಅಸಾಮಾನ್ಯ ಆರೋಗ್ಯ ತುರ್ತು ಪರಿಸ್ಥಿತಿ.
