ಸಂಘರ್ಷ ಪೀಡಿತ ಪ್ರದೇಶಗಳಲ್ಲಿ ಲೈಂಗಿಕ ಹಿಂಸಾಚಾರ : ಇಸ್ರೇಲ್-ರಷ್ಯಾ ಕಪ್ಪುಪಟ್ಟಿಗೆ
ಸಂಘರ್ಷ ಪೀಡಿತ ಪ್ರದೇಶಗಳಲ್ಲಿ ನಡೆಯುತ್ತಿರುವ ಲೈಂಗಿಕ ಹಿಂಸಾಚಾರ (sexual violence) ಪ್ರಕರಣಗಳ ಕುರಿತು ವಿಶ್ವಸಂಸ್ಥೆ (UN) ಬಿಡುಗಡೆ ಮಾಡಿದ ಇತ್ತೀಚಿನ ವರದಿಯಲ್ಲಿ ಇಸ್ರೇಲ್ ಹಾಗೂ ರಷ್ಯಾವನ್ನು ಕಪ್ಪುಪಟ್ಟಿಗೆ (Blacklist) ಸೇರಿಸಲಾಗಿದೆ. ಸಂಘರ್ಷ ಸಂದರ್ಭಗಳಲ್ಲಿ ಲೈಂಗಿಕ ಹಿಂಸಾಚಾರ ನಡೆಸಿದ ಆರೋಪದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ವರದಿ ಪ್ರಕಾರ, 2025ರಲ್ಲಿ ವಿಶ್ವದಾದ್ಯಂತ ಸಂಘರ್ಷಗಳಿಗೆ ಸಂಬಂಧಿಸಿದ 9,788 ಲೈಂಗಿಕ ಹಿಂಸಾಚಾರ ಪ್ರಕರಣಗಳು ದಾಖಲಾಗಿದ್ದು, ಇದು ಹಿಂದಿನ ವರ್ಷದ ಸಂಖ್ಯೆಗೆ ಹೋಲಿಸಿದರೆ ಎರಡು ಪಟ್ಟು ಹೆಚ್ಚು.
ವರದಿಯಲ್ಲಿ ಅತ್ಯಾಚಾರ, ಸಾಮೂಹಿಕ ಅತ್ಯಾಚಾರ, ಲೈಂಗಿಕ ದಾಸ್ಯ, ಬಲವಂತದ ವಿವಾಹ, ಮಾನವ ಕಳ್ಳಸಾಗಣೆ ಹಾಗೂ ಅಪಹರಣ ಸೇರಿದಂತೆ ಹಲವು ರೀತಿಯ ಲೈಂಗಿಕ ದೌರ್ಜನ್ಯಗಳನ್ನು ದಾಖಲಿಸಲಾಗಿದೆ. ಇವುಗಳನ್ನು ರಾಜ್ಯ ಹಾಗೂ ರಾಜ್ಯೇತರ ಸಶಸ್ತ್ರ ಗುಂಪುಗಳು 21 ಸಂಘರ್ಷ ಪೀಡಿತ ರಾಷ್ಟ್ರಗಳಲ್ಲಿ ಎಸಗಿರುವುದಾಗಿ ಹೇಳಲಾಗಿದೆ.
ಇದನ್ನೂ ಓದಿ : ವಿಶ್ವಸಂಸ್ಥೆ ಕುರಿತ ಸಂಪೂರ್ಣ ಮಾಹಿತಿ : ಎಲ್ಲಾ ಸ್ಪರ್ಧಾತ್ಮಕ ಪರೀಕ್ಷೆಗಳಿಗಾಗಿ
ಒಂದು ವರ್ಷದ ಮಗುವಿನಿಂದ 70 ವರ್ಷದ ವಯೋವೃದ್ಧರವರೆಗೆ ವಿವಿಧ ವಯೋಮಾನದವರು ಈ ದೌರ್ಜನ್ಯಗಳ ಸಂತ್ರಸ್ತರಾಗಿದ್ದಾರೆ. ಅಂಗವಿಕಲರ ಮೇಲಿನ ಲೈಂಗಿಕ ಹಿಂಸಾಚಾರ ಪ್ರಕರಣಗಳೂ ವರದಿಯಲ್ಲಿ ದಾಖಲಾಗಿವೆ.
ಮಹಿಳೆಯರು ಮತ್ತು ಬಾಲಕಿಯರು ಪ್ರಮುಖ ಗುರಿಯಾಗಿದ್ದರೂ, ಪುರುಷರು ಮತ್ತು ಬಾಲಕರೂ ಸಹ ಬಂಧನ ಕೇಂದ್ರಗಳಲ್ಲಿ ಹಾಗೂ ಚಿತ್ರಹಿಂಸೆಯ ರೂಪದಲ್ಲಿ ಲೈಂಗಿಕ ಹಿಂಸೆಗೆ ಒಳಗಾಗಿರುವುದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. LGBTQI+ ಸಮುದಾಯದ ಸದಸ್ಯರು ಕೂಡ ಗುರಿಪಡಿಸಿದ ಕಿರುಕುಳ ಮತ್ತು ಹಿಂಸೆಯ ಹೆಚ್ಚಿದ ಅಪಾಯವನ್ನು ಎದುರಿಸುತ್ತಿದ್ದಾರೆ.
ವಿಶ್ವಸಂಸ್ಥೆಯ ವರದಿಯ ಅನುಬಂಧದಲ್ಲಿ ಒಟ್ಟು 77 ಸಂಘಟನೆಗಳು ಮತ್ತು ಪಕ್ಷಗಳನ್ನು ಸಂಘರ್ಷ ಸಂಬಂಧಿತ ಲೈಂಗಿಕ ಹಿಂಸಾಚಾರಕ್ಕೆ ಹೊಣೆಗಾರರೆಂದು ಗುರುತಿಸಲಾಗಿದೆ. ಇವುಗಳಲ್ಲಿ 62 ರಾಜ್ಯೇತರ ಸಶಸ್ತ್ರ ಗುಂಪುಗಳಾಗಿವೆ. ಕಾಂಗೋ ಪ್ರಜಾಸತ್ತಾತ್ಮಕ ಗಣರಾಜ್ಯದಲ್ಲಿ ಕಾರ್ಯನಿರ್ವಹಿಸುವ ಮೂರು ಹೊಸ ಸಶಸ್ತ್ರ ಗುಂಪುಗಳನ್ನು ಈ ವರ್ಷ ಪಟ್ಟಿಗೆ ಸೇರಿಸಲಾಗಿದೆ.
ಇದೇ ವೇಳೆ, ಉಕ್ರೇನ್ ಯುದ್ಧದ ಸಂದರ್ಭದಲ್ಲಿ ಯುದ್ಧ ಕೈದಿಗಳು ಮತ್ತು ಬಂಧಿತ ನಾಗರಿಕರ ಮೇಲಿನ ಲೈಂಗಿಕ ಹಿಂಸಾಚಾರದ ಆರೋಪದ ಹಿನ್ನೆಲೆಯಲ್ಲಿ ರಷ್ಯಾದ ಸಶಸ್ತ್ರ ಹಾಗೂ ಭದ್ರತಾ ಪಡೆಗಳನ್ನುಕಪ್ಪುಪಟ್ಟಿಗೆ ಸೇರಿಸಲಾಗಿದೆ.
ಅದರ ಜೊತೆಗೆ, ಇಸ್ರೇಲ್ನ ಸಶಸ್ತ್ರ ಹಾಗೂ ಭದ್ರತಾ ಪಡೆಗಳನ್ನೂ ವಿಶ್ವಸಂಸ್ಥೆ ಹೊಸದಾಗಿ ಪಟ್ಟಿಗೆ ಸೇರಿಸಿದೆ. ಗಾಜಾ ಯುದ್ಧಕ್ಕೆ ಕಾರಣವಾದ 2023ರ ಅಕ್ಟೋಬರ್ 7ರ ದಾಳಿಯ ಬಳಿಕ ಈಗಾಗಲೇ ಕಪ್ಪುಪಟ್ಟಿಗೆ ಸೇರಿದ್ದ ಹಮಾಸ್ ಉಗ್ರ ಸಂಘಟನೆಯೂ ಈ ಪಟ್ಟಿಯಲ್ಲಿ ಮುಂದುವರಿದಿದೆ.
ಸಂಘರ್ಷ ಪ್ರದೇಶಗಳಲ್ಲಿ ಲೈಂಗಿಕ ಹಿಂಸಾಚಾರವನ್ನು ತಡೆಗಟ್ಟಲು ಮತ್ತು ಸಂತ್ರಸ್ತರಿಗೆ ಸೂಕ್ತ ನೆರವು ಒದಗಿಸಲು ಜಾಗತಿಕ ಸಮುದಾಯ ತುರ್ತು ಕ್ರಮ ಕೈಗೊಳ್ಳಬೇಕಾಗಿದೆ ಎಂದು ವಿಶ್ವಸಂಸ್ಥೆ ವರದಿಯಲ್ಲಿ ಒತ್ತಾಯಿಸಿದೆ.
ಜಾಗತಿಕ ಮಟ್ಟದಲ್ಲಿ ಹೆಚ್ಚುತ್ತಿರುವ ಅಸುರಕ್ಷತೆ, ಜನರ ಸ್ಥಳಾಂತರ ಮತ್ತು ಸಂತ್ರಸ್ತರಿಗೆ ನೆರವು ನೀಡಲು ಅಗತ್ಯ ಸಂಪನ್ಮೂಲಗಳ ಕೊರತೆ ಈ ಪರಿಸ್ಥಿತಿಯನ್ನು ಮತ್ತಷ್ಟು ಗಂಭೀರಗೊಳಿಸಿದೆ ಎಂದು ವರದಿ ತಿಳಿಸಿದೆ.
